Суд кайыме годым аудиопротоколым возаш тӱҥалыт

Суд кайыме годым аудиопротоколым возаш тӱҥалыт
Республикысе судья- влак Советын черетан заседанийже эртен. Тушто каҥашыме ик йодышыжо районысо да оласе суд- влакын суд заседанийыште аудиопротоколым возаш ямде улмышт нерген лийын. Суд департамент виктемым вуйлатыше Владимир Шагов каласен: у сомыл икымше сентябрь гыч илышыш шыҥдаралтеш. Чыла оласе да районласе суд- влакын аудиойӱкым возаш техникышт ситышын уло. Суд заседаний эртыме заллаште возышо 37 стационар да 6 мобильный комплексым вераҥдыме да пашаш колтымо. Тиддеч посна цифран 50 диктофоным налме. Чыла тидыже судопроизводствын жапшым кӱчыкемдаш полша. Мутлан, кодшо ийын республикысе суд- влак аудиофиксаций полшымо дене возымо кум тӱжемат 380 пашам ончен лектыныт.

Прошлые выпуски