«Усталыкын пиалже» лӱман ончер почылтеш
Йошкар-Олаште Евгений Ярановын «Усталыкын пиалже» лӱман ончерже почылтеш. Республикысе тӱссымыктыш тоштерыште 8-ше октябрьыште Российын сулло сӱретчыжын 70 ияш лӱмгечыжлан пӧлеклалтше ончерже ышташ тӱҥалеш. Экспозицийыште Евгений Ярановын тӱрлӧ ийлаште сӱртелыме живопись пашаже- влакым тоштерын фондшо да посна коллекцийла гыч калык ончыко луктыт. Сӱретче кугу мер пашамат шукта. Тудо Российын сӱретчыже- влак ушемын Юл кундем округышто Российысе усталык мер организацийын секретарьже улеш, 2005-ше ий годсек сӱретче- влак ушемын Марий Элысе пӧлкажым вуйлата.
