Утарыше-влаклан аэропушым налыныт
Марий аварийно-утарыше службо у спецтехника дене пойдаралтын. Республикысе правительство тудым Козьмодемьянск олашке колтен. Юл эҥер серыште шошым, ий тарваныме жапыште, утарыше-влак туткарыш логалше колызо-шамычым утараш чӱчкыдын лектыт. Но кызыт марте тидлан келыштарыме шке пушышт лийын огыл. Тудым Козьмодемьянскысе эмлымвер гыч налаш пернен. Республикысе бюджет гыч ойырымо окса дене налме аэропуш дене утарыше-влак ынде ий кайыме жапыште Юл ден Вӱтла эҥерлаште могай сӱрет улмым эскерен да, кӱлеш гын, кӱчык жапыште полышым пуэн кертыт. Аэропуш ик шагатыше 100 километр марте писештын да ик тонн марте грузым вераҥден кертеш. Тудым вӱдышто, ий ӱмбалне да купан верлаште кошташ йӧнештарыме. Тиддеч посна курыкмарий утарыше-влаклан квадрациклым пӧлекленыт. А теве Кокшайскысе аварийно-утарыше службышко у УАЗ машинам колтеныт.
