Марий Элысе гармоньчо-влак эн тале улыт
Кодшо арня мучаште Киров кундемыште «Вятские-хватские» Всероссийский фестиваль эртен. Тушко Киров, Вологда, Брянск, Угарман, Архангельск областьла, Екатеринбург, Кострома, Беларусь, Удмурт да Марий Эл республикла гыч музыкант ден кид мастар-влак чумыргеныт. Марий кундем гыч мийыше коллектив-влак шкеныштым пеш сайын ончыктеныт да икмыняр гран-прим конденыт. Шернур район гыч «Кас гармонь» ансамбль «Куштышо да семӱзгар ансамбль» номинацийыште, Курыкмарий район гыч Россий да Марий Эл тӱвыран сулло пашаеҥже Арсений Яйцов «Фестивальын шӧртньӧ фондшо» номинацийыште.Палемден кодыман: Шернурысо «Кас гармонь» ансамбль тиде фестивальыште икымше гана огыл шкенжым терген. Тений тудын номерже-влакым Марисола кундемын эргыже-влак, кум йыгыр изак-шоляк Шабдаровмыт, сӧрастареныт. Моткоч чолга да талантан нине йоча-влак Шернур районын «визитный картычкыже» улыт манаш лиеш.
