Вич ий гыч республикыште газым ситарымаш 90 утла процентыш шушаш

                      Вич ий жапыште Марий Элым газифицироватлаш «Газпром» ныл миллиард утла теҥге оксам колта. 2025-ше ий марте Республикынам 90 утла процентлан газифицироватлыме лиеш. Тиде пашалан ныл миллиард теҥге инвестиций толшаш. Тидын нерген Республикым вуйлатыше Александр Евстифеевын «Газпром межрегионгаз» компанийын генеральный директоржо Сергей Густов дене вашлиймашыштышт пале лийын. Мутланымаш видеоконференций йӧн дене эртен. Сергей Густов вуйлатышым республикын 100 ияш лӱмгечыж дене саламлен, а Александр Евстифеев Приволжский посёлкышто ФОК-ым чоҥен пытараш полшымылан тауштен. Спорт комплексым 1-ше февральлан почаш палемдыме манын да Густовым республикыш толаш ӱжын. 2002-шо ий гыч «Газпром» республикыште газым пурташ кум миллиард утла теҥге оксам кучылтын. Тидыже 723 меҥге кужытан 46 газпучым чоҥаш йӧным ыштен. Пӧрт- влакым ушымо шотышто республике пеш чаткан пашам ыштен,- каласен Сергей Густов. 25-ше ий марте 6 районышто эше 17 объектым чоҥаш да 58 ялыш газым пурташ палемдыме. Тыге кум тӱжемат 870 сурт газ пуч деке ушна да 16 котельный газыш кусаралтеш.
              Газификацийын тӱшка кугытшо республикыште 90,8 процентыш шушаш, а яллаште 80, 85 шӱдаш процент лийшаш. Вашлиймашыште тыгак Килемар ден Юрино районлам газифицироватлыме йодышым посна каҥашеныт. Тыгак газ дене пайдаланымылан тӱлен шуктыдымо парымым ушештарыме. Икымше ноябрьлан тӱрлӧ пайдаланышын 213 миллион теҥге парымже погынен. Тидыже ӱмашсе деч 43 миллионлан шагалрак.

Прошлые выпуски