Волжск олан депутатше- влак ола гоч кайыше транзит корным республикын погышкыжо кусареныт
Волжск олан депутатше- влак ола гоч кайыше транзит корным республикын погышкыжо кусареныт. Марий Элым вуйлатышын пашажым шуктышо Юрий Зайцевын кӱштымыжӧ почеш Волжск ола гоч шуйнышо Татарстаныш кайыше да мӧҥгеш толмо корно регион кӱкшытан статусым налеш. Тидын нерген Волжскысо ола погынымашын депутатше- влак решенийым луктыныт. Тидыже олан бюджетшым транзит корным капитально олмыктымо да кучымо роскот деч утара. Тидын нерген Юрий Зайцев Волжскын мэрже Рафис Шагвалеев дене мутланен ыле. Тунам тудо корным кучымаш муниципал бюджетыш вочшаш огыл манын. Транзит корнын кужытшо шым меҥге наре кужытыш шуйна. Тушко Йошкар-Ола шоссе, Прохоров уремын ужашыже, Матюшенко, Карл Маркс, Щорс да Кошкин урем пурат. Тиде корно дене пырля тудын воктелсе ужашыжат республикын погышкыжо савырна. Ынде документым Республикысе пого министерстве ямдылаш тӱҥалеш. Вара тиде корным республике капитально олмыкташ, лумым эрыкташ, волгалтараш, корно лӱдыкшыдымылыкым ышташ тӱҥалеш. Тымарте тиде пашам Волжск ола шуктен.
Фото: Марий Элым вуйлатышын организаций да аналитик виктемже.
Фото: Марий Элым вуйлатышын организаций да аналитик виктемже.
