Дмитрий Григоренко ден Юрий Зайцев йӱлышӧ чодыра кумдыкым вертолёт гыч ончен савырненыт

            Россий Федерацийын вице-премьерже Дмитрий Григоренко ден Марий Элым вуйлатышын пашажым шуктышо Юрий Зайцев йӱлышӧ чодыра кумдыкым вертолёт гыч ончен савырненыт. Теҥгече Российын Президентше Владимир Путинын кӱштымыжӧ почеш Угарман областьыште чодыра пожарым аклаш манын Правительствын комиссийже толын. Россий Правительствын вице-премьерже Дмитрий Григоренко, Россий МЧС-ым вуйлатыше Александр Куренков, Российын пӱртӱс поянлык да экологий министрже Александр Козлов Воротын районысо Кузьмияр посёлкыш тулым йортымӧ шотышто оперативный штабыш толыныт.
           Верыште Правительстве комиссийын еҥже- влак Юл кундем округышто полномочный представитель Игорь Комаров, Марий Элым вуйлатышын пашажым шуктышо Юрий Зайцев да Угарман областьын губернаторжо Глеб Никитин дене пырля тул деч эмганыше чодыра кумдыкым юж гыч ончен савырненыт.
          Оперштабын заседанийыштыже Марий Элым вуйлатышын пашажым шуктышо Юрий Зайцев Юрино районышто йӱлышӧ чодыра нерген ойлен. Тул чылаже 700 гектарым йӱлалтен, кызыт тул эртыме кумдык кӧргыштӧ 17 гектарже шикшештеш, тулым йыр минерализованный полоса дене авырен налме, йырым- йыр тулым ылыжтен, ваштарешла колтымо. Уэш ылыжше вер уке. Кокшӱдӧ утла пӧртан Васильевский села йыр тыгак мландым куралме, тудлан лӱдыкшӧ уке. Угарман областьланат тулым йӧрташ полыш пуалтеш.
          Полномочный представитель ешарен: чот шокшо шогымылан кӧра округысо 13 регионышто чодыра пожар- влакым регистрироватлыме. Куд округышто тулым икымше суткаштак йӧртымӧ.
         Угарман областьын губернаторжо Глеб Никитинат докладым ыштен. Тудо чыла структуро, Россий  да Марий Эл правительстве дене чаткан пашам ыштыме нерген ойлен. 94 меҥге кужытан да лу метр кумдыкан минерализованный полосам ыштыме. Вес семын каласаш гын, чодыра мучко шӱдӧ меҥге наре кужыт у корным пыштыме манын да пырля пашам ыштымлан чылалан тауштен ойлен.
             Фото: Марий Элым вуйлатышын организаций да аналитик виктемже.

Прошлые выпуски