Волжскышто «Курымеш 19» куржталмаш дене первенство эртен

Волжскышто «Курымеш 19» куржталмаш дене первенство эртен
            Волжскышто куржталмаш дене «Курымеш 19» первенство эртен. Ынде вич ий почела республикысе тӱрлӧ район да ола, Татарстан да моло республике ден область гыч спортсмен- влак Волжск олаш пырля погынат да ойыртемалтше спорт событийыште- куржталмаш дене «Курымеш 19» лӱман лично-командный таҥасымаште участвоватлат. Тудо поро йӱлаш да воин-интернационалист Игорь Шестаковым шарнымашыш савырнен.
            Тудо тора Афганистаныште лӱдде кредалын да геройла вуйжым пыштен. Игорь Шестаков Волжск олаште 1967-ше ийын 30-шо апрельыште шочын, 2-шо номеран школышто тунемын, 5-ше ГПТУ-што электросварщиклан тунем лектын да 268-ше ПМК-ште пашам ыштен. 1985-ше ийын ноябрьыште армийыш каен да юж-десант войскаш логалын. Самырык боецын курсшым Ашхабадыште эртен, вара Афганистаныш колтеныт. Разведке батальонышто служитлен. Самырык, 19 ияш гына лийын гынат, чолгалык ден лӱддымылыкым ончыктен. Тудын подвигшым, уке лиймекыже, кугыжаныш награде-Йошкар Шӱдыр орден дене палемдыме. Тудын лӱмжым Волжск оласе ик уремлан пуымо, тудын илыме пӧрт пырдыжеш да 2-шо школеш мемроиал оҥам пижыктыме, тунемме школыштыжо геройын бюстшым шогалтыме.
            Таҥасымашым ямдылыше- влак герой-землякыштын лӱмжым шарнымашеш кодаш да тудын лӱмеш самырык да тӱрлӧ ийготан- влак коклаште куржталмаш дене таҥасымашым эртараш пунчалыныт.- Воза "Волжская правда" газет.
         Фото: Вячеслав Мартьянов.

Прошлые выпуски