Йошкар-Ола администрацийыште оласе ветеран- влакын вашлиймашышт эртен
Йошкар-Ола администрацийыште оласе ветеран- влакын вашлиймашышт эртен. Ветеран- влакын оласе советыштым вуйлатыше Геннадий Мустаев тенийлан паша план дене палдарен, оласе тӱшка субботниклашке, Сеҥымаш кечым эртарымашке, оласе мероприятийлашке ушнымо йодышлам каҥашеныт. Геннадий Мустаев тидымат ушештарен: 2023-шо ийым туныктышын да наставникын идалыкше семын увертарыме. Олаште тачысе кечылан педагог пашан тӱжемат 800 ветеранже ила. Тымарте ятыр мероприятийым эртарыме. Ветеран- влак СВО-н участникше- влаклан гуманитар полышым погымаште тыршат. Тидымат палемдыме: тений «Йошкар-Олан почётан гражданинже» чап лӱмым пуаш тӱҥалмылан 55 ий темын. 2023-шо ий тӱҥалтышлан тиде лӱмым 50 еҥ налын. Нунын коклаште пашазе, партий да озанлык активын еҥышт, туныктышо, тӱвыра пашаеҥ, врач да шанчыеҥ- влак улыт. Кызыт олаште 12 Почётан гражданин ила. Мэрын алмаштышыже Сергей Мухортов погынышо- влакым олан илышышкыже чолган ушнен шогымылан, оласе йодышлам виктарен колташ полшымыштлан тауштен да йодышыштлан вашештен. Вашлиймаш чулым ветеран- влаклан тауштымашан серышым кучыктымаш да Ленин лӱмеш тӱвыра полатыште концерт дене мучашлалтын.
Фото: Архив.
Фото: Архив.
