Йошкар-Олан мэрийже У ийым пайремлаш ямдылалташ лиеш манын каласен
Йошкар-Олан мэрийже У ийым пайремлаш ямдылалташ лиеш манын каласен. Ола администрацийыште мэр Евгений Маслов пресс-конференцийым эртарен. Каҥашыме ик йодышыжо рӱдӧ олаште у ий пайремым эртарымаш лийын. Молан манаш гыч, пандемий шке вашталтышыжым пуртен. Сандене эн тӱҥжӧ калыкын тазалыкшым арален кодыман. Туге гынат, поро йӱла семын рӱдӧ площадьыште У ий кожым вераҥдыме лиеш, тыгак, 110 кудывечым ужар кож сӧрастараш тӱҥалеш. Ленин лӱмеш площадьыште тыгак карусель, батут, автопоезд «Экспресс-шоссе», фотозона- влак лийыт. Йӱштӧ Кугыза ден Лумӱдырын да У ийын символжо- Ӱшкыжын ий фигурышт вераҥдалтыт. Рӱдӧ каныме паркыште «Колесо обозрения» аттракцион пашам ышташ тӱҥалеш. Сеҥымаш парк ден Совет Армийын тӱвыра полатше воктене Кож- влак лийыт. Сеҥымаш Паркыште тиде каныш кечын каток почылтеш. Тиддеч посна Воскресенский парк воктене, Тазалык аллей ончылно да эше кандаш верыште каток- влакым ыштат. Семёновкышто каток пашам ышташ тӱҥалын. Йошкар-Олам пайремлан келшышын сӧрастарыме лиеш.
