Йошкар-Оласе пырдыж сӱрет сеҥыше радамыш логалын огыл
Марий Эл гыч граффити Юл кундем округысо стрит-артын «Форм-арт» фестивальыштыже ончыко лектын ыш керт. Кодшо кечылаште сеҥыше- влакым палемдыме да фестивальым петырыме онлайн церемоний эртыш. Уремысе сымыктышын округжной проектше Юл кундем округышто Россий президентын полномочный представительже Игорь Комаровын тӱҥалтышыже почеш шыҥдаралтеш. Сеҥыше- влакым калык йӱклымашым да эксперт йӱклымашым иктыш ушен шотлымеке рашемдыме. Йӱклымашке 100 тӱжем утла еҥ ушнен. Эн сайлан Самара да Саратов областьлан пошаштым шотлымо. Нуно 48 да 22 тӱжем утла йӱкым погеныт. Сеҥышыш Самара область гыч Оксана Гладкован «Яндар шӱлыш» граффити пашаже лектын. Кокымшо верым Саратов область гыч Юрий Быковын «Илышын пеледышыже» пашаже налын. Кумшо верым Башкортостан гыч Мансур Зияевын «Доктор сити» сӱретшылан пуымо. Сӱрет- влакым пӱртӱсым аралыме да осал чер ваштареш кучедалме темылан пӧлеклыман ыле. Марий Эл гыч Татьяна Белова Самырык- влакын полатыштын пырдыжешыже сӱретлыме «Планета» пашажым колтен ыле.
