Йошкар-Оласе аэропортын у терминалжылан проектым Санкт-Петербург гыч специалист- влак ышташ тӱҥалыт

                      Йошкар-Оласе аэропортын у терминалжылан проектым Санкт-Петербург гыч специалист- влак ышташ тӱҥалыт. Юж транспортын «Ленаэропроект» проектно- изыскательский да научшо шымлыше институтшо Йошкар-Олаште пассажир терминалым чоҥаш подрядчикым ойырымо конкурсышто сеҥышыш лектын. Тушто кок претендент лийын. Весыже- Хабаровск гыч юж транспортын «Дальаэропроект» проектно- изыскательский институтшо.
                Чыла ямдылалтме пашалан 59 миллион утла теҥге оксам палемдыме. Пашан тиде ужашыжым тений 14-ше декабрь марте ыштен шуктышаш улыт. А шушаш ийын 30-шо апрель марте документацийым  согласоватлаш да экспертизым эртараш кӱлеш. Чоҥымо паша кок ужаш гыч шогаш тӱҥалеш. Эн ончыч аэровокзалын зданийжым чоҥат, вара перрон ден мийыме корным. Эше ик условийже- чоҥымо жапыштак кызытсе аэропортат пашам ыштышаш. У аэровокзал ик шагатыште кокшӱдӧ пассажирым колтен кертше лийшаш. Кызыт тудын куатше- шагатыште 100 пассажир. Терминалым проектроватлыме да чоҥымо паша 740 миллион теҥгелан аклалтеш, а чоҥештен кӱзымӧ да волен шичме полосам пужен ыштымаш кок миллиардат 400 миллион теҥгеш.
               «Ленаэропроект» институт 1960-шо ий годсек пашам ышта. Тудо пытартыш жапыште «Сочи», «Соловки», «Мирный», «Нижний Новгород», Калининградыште «Храброво» да моло аэропорт- влаклан проектым ыштен.

Прошлые выпуски