Республикым вуйлатыше Медведево гимназийыште лийын
Республикым вуйлатыше тунемме тӧнеж- влакым олмыктымо годым кузе федерал оксам кучылтмым терген лектын. Тудо Медведево гимназийыште лийын. Тиде ик эн тошто туныктымо тӧнеж. Тудым 1962-шо ийыште чоҥымо. «Туныктымо пашам вияҥдымаш» кугыжаныш программе кышкарыште гимназийын пӧртшым капитально олмыктымо. Директоржо Ольга Сырейщикован мутшо почеш, зданийым тӱжвал могырымат, кӧргыштыжат капитально тӧрлымӧ. Тушто оролышо постым ыштыме, видеоэскерымашым пуртымо. Республикым вуйлатыше уэмдыме спортзалым ончен, столовыйыш пурен. Тушто вентиляцийым, окна блокым вашталтыме, кӱвар ден пырдыжым кафель дене комыжлымо. Директор ешарен: шокшо кочкыш дене пукшаш правительствын полшымыж дене у оборудованийым налме. Тидыже повар- влакын пашаштым куштылымден, а йоча- влаклан сай качестван кочкышым ямдылаш полша. Тыгак актовый зал тичмаш вашталтын. Информатике кабинетыште у оборудованийым вераҥдыме. Олмыктымо пашалан 87 миллион наре теҥге каен. Тиде тӱҥ шотышто федерал окса. Ачалымаш школын чыла ужашыштыжат шукталтын, а тӱжвал могыржо тора гычак волгалт шинча. Туныктышо- влакланат, тунемше- шамычланат чылажат келшен.
