Йошкар- Олаш пурымо корным олмыктен, норматив марте шуктымо
Йошкар- Олаш пурымо корным олмыктен, норматив марте шуктымо. Водитель- влакым тудо поснак куандарен. Йошкар-Ола- Козьмодемьянск корнын 4-ше гыч 19-ше меҥгыж марте ужашым «Йошкар-Олаш пурымо корно» манын лӱмденыт. Тудо Йошкар-Оласе Строитель да Йыван Кырла урем ушнымо вер гыч «Поветлужье» федерал корно марте шуйна. Республикысе тӱшкан пайдаланыме автомобиль корнын перечньышкыже келшыше вашталтышым пуртымо. «Лӱдыкшыдымӧ да сай качестван автомобиль корно- влак» калыкле проектым шыҥдарыме кышкарыште «Йошкар-Олаш пурымо корным» тичмаш норматив марте шуктымо, эсогыл пашам жап деч ончыч ыштыме. Документ почеш олмыктымо пашам 2021-ше ийлан палемдые ыле, но Россий Федерацийын резерв фондшо гыч оксам ешарен ойырымылан кӧра, тенияк олмыктымо. Корным тӧрлымаш кум ужашыште, чылаже 13 уштышат 300 метр кужытышто шукталтын. Подряд органиазций корно шартышым вашталтен, ӱмбакыже асфальтобетоным пыштыме, корно тӱрым тыгыде кӱ дене пеҥгыдемдыме, автобус чарныме верым ыштыме, вӱд йогымо пуч- влакым тӧрлымӧ, корно палым, барьерым, сигнал меҥгым, разметкым ыштыме, - увертара «Республикысе корно- влак» паблик.
