Йошкар-Олаште автомагистральым чоҥымо паша экшык деч посна кая
Йошкар-Олаште автомагистральым чоҥымо паша экшык деч посна кая. Марий Элым вуйлатыше Александр Евстифеев Киров ден Строитель уремлам ушышаш магистральым чоҥымаште лийын да выездной совещанийым эртарен. Палемдыме: паша, тӱҥ шотышто, график почеш шукталтеш. Жап почеш утларак почеш кодмаш канализацийым пужен ышташ пучым кондыдымылан кӧра шижалтеш. Кызыт пучым тичмаш конден шуктымо. Тымарте газ пучым у семын пыштыме, 85 процентлан рокым нӧлтен оптымо, кӱварын негыз меҥгыжым нӧлтат да канализацийым ыштат. Совещанийын участникше- влак кӱварлан металлоконструкцийым кондымым каҥашеныт. Транспорт министр Александр Герасименкон мутшо почеш, кондышаш организацийым рашемдыме, нунын дене мутланымаш кая. Икмыняр завод дене кутырен келшыме. Оксам жапыштыже тӱлаш гын, нуно 60-80 кечыште ыштен шуктат. Марийскавтодорын генеральный диекторжо Евгений Козырев палемден: экспертизын заключенийже 20-шо октябрь деч вара лиеш, вара конкурс процедура тӱҥалеш. Республикым вуйлатышын мутшо почеш, кызыт федерал бюджет гыч ешарен оксам ойырымо шотышто йодыш каҥашалтеш. Тений 70-100 миллионлан оксам ешарен пуымо йодыш ончалтеш. Марийскавтодорым вуйлатыше пашам писемден колташ ямде улмо нерген каласен да тенийлан шындыме задаче тӱрыс шукталтеш манын ӱшандарен.
