Йошкар-Олаште калыкле проект почеш кызыт вич корным олмыктат

Йошкар-Олаште калыкле проект почеш кызыт вич корным олмыктат
               Йошкар-Олаште калыкле проект почеш кызыт вич корным олмыктат. Йошкар-Олан мэрже олмеш жаплан ыштыше Антон Трудинов республикысе транспорт да корно озанлык министр Александр Герасименко дене вашлийын. Нуно оласе корнылаште лӱдыкшыдымылыкым кугемдыме, у корно пале- влакым шогалтыме, чарналтыш павильонлам ачалыме да уым чоҥымо нерген ойленыт. Тений рӱдӧ олаште калыкле проект почеш куд уремыште олмыктымо паша шукталтеш. Антон Трудинов тушто кызыт кузе паша кайыме нерген каласкален. Ик уремым тымарте шотыш кондымо. Складской уремысе корным эксплуатацйиыш 11-ше июньышто пуымо. Тенийсе эн кужу ужаш- тиде Тыныслык урем, кум меҥге утла шуйна. Тушто 21 процент пашам шуктымо. Кугу Чигаш уремыште пашан пелыжым ыштыме. Петров уремым икымше августлан мучашлышаш улыт. Тушто 70 процент пашам шуктымо. Кокшайск проезд 85 процентлан ямде. Яналов уремыште паша мучашыш лишемеш. Тушто корно палым вераҥдаш да разметкым ышташ кодын. Эше кок корнышто подрядчикым палемдыме. Тиде Сад уремын Машиностроитель деч Шумелёв урем марте ужашыже да Шумелёв уремын Строитель деч Бауман урем марте ужашыже. Нуным июльышто олмыкташ тӱҥалыт да сентябрьыште мучашлышаш улыт.
           Фото: Йошкар-Ола мэрий

Прошлые выпуски