Йошкар-Олаште Российысе финн-угор калык- влакын Россий кӱкшытан кумшо форумышт лиеш

Йошкар-Олаште Российысе финн-угор калык- влакын Россий кӱкшытан кумшо форумышт лиеш
              Йошкар-Олаште Российысе финн-угор калык- влакын Россий кӱкшытан кумшо форумышт элысе 32 регион гыч 230 делегатым вашлиеш. Форум мемнан дене 9-ше гыч 12-шо сентябрь марте эрта. Теҥгече Марий Элым вуйлатыше Юрий Зайцев мероприятийым ямдылыме шотышто оргкомитетын заседанийжым эртарен. Форумым калык- влакын пашашт шотышто федерал агентстве, Российысе финн-угор калык- влакын ассоциацийышт пырля эртарат. Тений мероприятийын тӱҥ темыже- «Финн-угор самырык тукым вашталт шогышо тӱняште» лӱман лиеш.
             Уло элым ушышо форум Российысе калыкле политикын тӱҥ площадкыже лиеш Ме тиде федерал кӱкшытан мероприятийым чаплын эртарен колтышаш улына,- кӱштен каласен Марий Элым вуйлатыше.
              Федерал агентствын калык кокласе кыл шотышто кугыжаныш политике виктемжым вуйлатыше Тимур Цыбиковын мутшо почеш, форум 230 еҥым чумыра. Мероприятийыште Президент администрацийын, Кугыжаныш Думын, федерал да регионласе кучем органлан, кугу компанийлан еҥышт лийшаш улыт. Финн-угор калык- влакын ассоциацийшт дене пырля самырык- влакын проектыштлан конкурсым эртарыме. Тушко 40 утла йодмаш пурен. Кум номинаций дене сеҥыше ден призёр- влакым палемдыме. Нуно мероприятий кышкарыште наградым налыт,- увертарен Тимур Цыбиков.
              Форумым торжественно почмаш 10-шо сентябрьыште Эрик Сапаев лӱмеш опера да балет кугыжаныш академический театрыште лиеш. Панель дискуссий- влак калык- влакын келшымаш пӧртыштышт да Марий университетыште эртат. Тиде кечынак Правительстве пӧртын заседаний залыштыже федерал агентствым вуйлатыше Игорь Бариновын вуйлатымыже почеш элысе финн-угор калык- влакым этнокультурно вияҥдыме мера- влак Комплексым шыҥдарыме йодыш дене совещаний лийшаш. Форум кышкарыштак элысе финн-угор калык- влак ассоциацийын 8-ше погынжо эрта. Тудо «Россий нацийын икгайлыкшым пеҥгыдемдымаште финн-угор калык-влакын йӱла семын вияҥше шӱм-чон яндарлык поянлыкше» теме дене эрта.
               Заседанийыште правительстве вуйлатышын алмаштышыже- тӱвыра министр Константин Иванов мероприятий- влак программе нерген каласкален. Форумын участникше- влак 11 тӱвыра тӧнежыш 29 мероприятийыш миен кертыт. Иктешлыше заседаний 11-ше сентябрьыште лиеш. А кастене самырык- влак полатыште «Фиин-угорий студенчествын миссше- 2025» конкурсын финалже лиеш.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски