Автоинспектор- влак йӱлышӧ пӧрт гыч погым луктедаш полшеныт
Автоинспектор- влак йӱлышӧ пӧрт гыч погым луктедаш полшеныт. Икымше сентябрь йӱдым Звенигово районысо Нурдамучаш ялыште пожар лийын. ДПС-ын сотрудникше- влак Сергей Немцев ден Сергей Сергеев патрулирований годым шикш нӧлталтмым ужыныт. Полиций лейтенант-влак пожарный- влакым ӱжыктеныт да йӱлымӧ верыш кудалыныт. Тушто сарай йӱлымым да воктене улшо пӧрт гыч шке арверыштым нумалше оза- влакым вашлийыныт. Автоинспектор- влак тунамак полшаш пижыныт. Тиддеч посна электротулым йӧртеныт, газым петыреныт, йӱлышӧ оралтыште моло иктат уло-укем терген лектыныт. Ушкалым вӱта гыч луктыныт. Тиде жапыштак тул пӧрт леведышыш да мончаш куснен. Лач тиде жапыште пожар машина толын шуын. ДПС инспектор- влак пожар рукавам шупшаш да тулым йӧрташ полшеныт. МВД-ште увертарыме почеш, кугыжаныш автоинспекцийын да пожарный- влакын чаткан ыштымыштлан кӧра иктат эмганен огыл, оза- влакын ятыр погыштым арален коден кертме.
Фото: Марий Эл МВД.
Фото: Марий Эл МВД.
