Юрий Зайцев Владимир Путинлан чодыра пожар шотышто умылтарымашым пуэн
Марий Элым вуйлатышын пашажым шуктышо Юрий Зайцев Российын Президентше Владимир Путинлан чодыра пожар шотышто умылтарымашым пуэн. Кугыжанышым вуйлатыше видеоконференций йӧн дене элысе икмыняр кундемыште тул ваштареш кучедалме йодыш дене совещанийым эртарен. Юрий Зайцев увертарен: кызыт республике кундемыште ик пожар уло. Тудо 700 гектар кумдыкым авалтен. Южо участкыште чарныде йӱлышӧ кумдыкшо 27 гектарыш шуэш. Кызыт тулым авырен налме. Тудын йырым- йырже мландым курал лекме да тулым ылыжтен вашареш колтымо. Угыч пижше верже уке. Кече еда «Авиалесоохранын да беспилотник- влакын полшымышт дене терген шогалтеш. Лу меҥге тораште верланыше Васильевский селалан лӱдыкшӧ уке. Яллаште шикш шарлымат ок шижалт. Пошкудо Угарман кундемысе коллеге- влакланат полыш пуалтеш. 185 еҥ да 40 единице техникым ушымо. Резервымат ямдылыме. Вий да технике ситыше. Владимир Путин палемден: тичмаш налмаште кодшо ийысе дене таҥастарымаште чодыра пожарын тӱшка кумыкшо кум пачаш нарылан шагалрак. Туге гынат чот шокшо шогымылан кӧра икымняр регионышто ситуаций куштылго огыл. Поснак Рязань областьысе пӱртӱс пожар шотышто.
Фото: Марий Элым вуйлатышын организаций да аналитик виктемже.
Фото: Марий Элым вуйлатышын организаций да аналитик виктемже.
