Марий йылме дене виктарыме сайт- влакын конкурсышт лиеш
Республикысе тӱвыра министерстве марий йылме дене вӱдымӧ сайт- влакын «Марнетын Шудыржӧ- влак» конкурсым увертара. Тушко марий йылме дене сайтым, порталым але разделжым, интернет- дневникым, интернет-сообществым вӱдышӧ юридический але физический лица- влак ушнен кертыт. Кажне участник ик номинацийыште ик сайтым темлен кертеш. Номинацийже тыгай улыт: кугыжаныш кучем органан эн сай сайтше; тӱвыра тӧнежын, туныктыш организацийын эн сай сайтше; Марий йылме дене савыктыме СМИ-н эн сай сеть версийже; марий калыкын тӱвыраже, сымыктышыже, йылмыже, историйже, юмынйӱлаже да йӱлаже нерген эн сай тематик сайт; эн сай авторский интернет-дневник (блог, микроблог), интернет-сообщество. Конкурсыш йодмашым 1-ше сентябрь гыч 1-ше ноябрь марте Йошкар-Оласе Кремль урем, 41-ше пӧртыштӧ налыт. Умылтарымашымат тӱвыра министерствыштак пуат.
