2025-ше ийыште Марий Эл Республикын бюджетшын парышыже ныл миллиардат 300 миллион теҥгелан кушкеш
2025-ше ийыште Марий Эл Республикын бюджетшын парышыже ныл миллиардат 300 миллион теҥгелан кушкеш. Шушаш ийын республикын консолидированный бюджетшын налог да налогдымо парышыже 40 миллиардат 900 миллион наре лийшаш. Тидыже ончыч тенийлан палемдыме план деч ятырлан кугурак- кугеммаш ныл миллиардат 300 миллион теҥге лиеш але 11, 6 процент. Теҥгече Юрий Зайцевын вуйлатыме дене Правительствын заседанийже эртен. Тушто кум ийлан бюджетын проектшым сайлан шотлымо. Докладым Правительстве вуйлатышын алмаштышыже- финанс министр Алексей Торощин ыштен. Тудо увертарен: 2026-шо да 2027-ше ийлаште налог да налогдымо парышын кушмыжо прогнозироватлалтеш. 2026-шо ийыште парыш 42,8 миллиард, 2027-ше ийыште 44, 7 миллиард теҥге лийшаш. Шушаш ийын социал роскот 70 процент лийшаш. Бюджет сферыште тыршыше- влакын пашадарыштым кугемдаш кок миллиардат 600 миллион теҥгем палемдыме. Корно озанлыкыште 6 миллиардат 100 миллион теҥгем корным чоҥаш, олмыкташ, кучаш шотлымо. Шушаш ийын кугыжаныш велым полшаш агропромышленный комплекслан 920 миллион утла теҥге ойыралтеш. Транспорт комплексым поддержатлаш шушаш ийын полыш 33 наре процентлан кушкеш. Тиде пашалан 844 миллион теҥгем колташ палемдыме. Тӱшка транспортым уэмдаш 200 миллион утла теҥгем колташ лийме. Тидыже тенийсе деч 14 процентлан шукырак.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
