Александр Евстифеев Россий правительство председательын алмаштышыже Марат Хуснуллинын эртарыме селектор совещанийыште участвоватлен

Кодшо кугарнян Республикым вуйлатыше Александр Евстифеев Россий правительство председательын алмаштышыже Марат Хуснуллинын эртарыме Россий кӱкшытан селектор совещанийыште участвоватлен. Тушто «Илыме вер да оласе кумдык» калыкле проект да тушко пурышо «Илыме вер», «Ипотека», «Оласе йӧнан кумдыкым ыштымаш», «Тошто пӧртлам пытарымаш» федерал проект- влакым илышыш шыҥдарыме нерген мутланыме. Марий Элыште тений январь- февральыште 43 тӱжемат 900 квадрат метр илыме верым ыштен шуктымо. Тидыже ӱмашсе тыгаяк жап дене таҥастарымаште 168 процент лиеш. Кызыт «Жильё» программе почеш Апшакбеляк ялыште шуко шочшан еш- влаклан ойырымо участкыла деке корным чоҥымо, Йошкар-Оласе Ураев уремын Киров деч Петров марте ужашыжым, Петров уремын Интернационалист воин- влак деч Шернур корно марте ужашыжым чоҥымо шотышто республикын чоҥымаш министерствыже программылашке ушнаш йодмаш- влакым ямдыла. «Оласе йӧнан кумдыкым ыштымаш» программе почеш 75 кудывечым да 46 тӱшка кумдыкым олмыктымо, Звениговышто Юл серым тӱзландарыме. Тений 87 кумдыкым- 37 кудывечым да 51 тӱшка кундемым тӱзаташ палемдыме. Илаш йӧрыдымӧ пӧртлам пытарыме шотышто ныл муниципал образованийыште паша шукталтеш: Йошкар-Олаште, Звенигово, Медведево да Советский районлаште. 10 тӱжемат 800 утла квадрат метр тошто илемым пытарен 748 еҥым кусарыман. 12-шо март марте 211 еҥым кусарыме. «Лӱдыкшыдымӧ да сай качестван автомобиль корно- влак» проект кышкарыште 128 меҥге кужыт утла корным пужен ыштыме лиеш. Йошкар-Ола агломерацийыште 15 уштышат 600 метр кужыт корно олмыкталтшаш.

Прошлые выпуски