Яллаш газым пуртымо йодыш теният Марий Эл Правительствын ик эн тӱҥ задачыже семын аклалтеш
Республикыш, эн ончычак яллаш, газым пуртымо йодыш, теният Марий Эл Правительствын ик эн тӱҥ задачыже семын аклалтеш. Тиде кӱлешан йодышым Правительстве пӧртыштӧ республикым вуйлатыше Александр Евстифеевын эртарыме вашлиймашыште каҥашыме. Поснак Курык марий районысо Покровское селашке газым пуртымо проблеме- влак нерген ойлымо. Пӱртӱс газын ялыш толмыжо, ялысе илышым путырак вашталтен колта. Сандене тыште тыгыде йодыш лийын ок керт. Таклан огыл республикым вуйлатыше кажне ял марте газым пуртымо йодышым шке умылаш тырша. Тиде гана тӱткышым Курык марий могырысо ик эн мотор селашке виктарыме. Тудым дачник- влак йӧратен шынденыт. Но тидыжак нелылыкым луктын. Эре илыше еҥ- влаклан газ моткоч кӱлеш гын, жапын- жапын толын илыше- влаклан пеш кӱлешыже уке, очыни. Тиде пӧрдем гыч кузе лекме йодышым да Курык марий районлан тичмаш газым ситарыме нерген тиде вашлиймашыште ойлымо. Курык марий районышто кызыт 82 утла процент кумдыкыш газ толын. У газ пуч Яматайкино, Исюткино, Федоткино, Парниньгаш, Берёзово, Каранькино, Макаркино, Цыганово, Атюлово да моло яллашкат канде тулым пурташ йӧным ышта. А Марий Эл мучко 89 наре процент илемлаш газым пуртымо.
