Республикысе Росреестр виктем эртыше идалыкыште эскроу-счётым кучылтын, 40 утла ойпидышым регистрироватлен
Республикысе Росреестр виктем эртыше идалыкыште эскроу-счётым кучылтын, шке оксам пыштен чоҥашлан 40 утла ойпидышым регистрироватлен. Тачысе кечылан республикыште эскроу- счётым кучылтын, шуко пачеран вич пӧрт чоҥалтеш. Ушештарена: эскроу-счёт- тиде банкысе счёт. Тушко оксам пыштен чоҥаш шонышо еҥ налшаш пачерлан оксажым аралаш пышта. А чоҥышо организаций тиде оксам пӧртым чоҥен пытарымеке да эксплуатацийыш пуртымеке гына налын кертеш. Оксам аралымылан мутым банк куча. Пыштыме оксалан процент ок куш. Росреестрын мутшо почеш, чоҥышо южгунам шке мутшым шуктен ок керт. Тидын годым эскроу-счётышто аралалтше оксам дольщиклан мӧҥгеш пӧртылтат. Вес семын каласаш гын, шке пыштыме окса нигуш ок йом. 2019-ше ий 1-ше июль гыч оксам пыштен чоҥымо годым ойпидышым эскроу-счётым кучылтын гына пеҥгыдемдышаш улыт. Ынде оксам пыштыше- влакын оксашт кӱшеш пӧртым чоҥаш ок лий. Лач эртыше ийын 1-ше июль марте ойпидышым ыштыше- влак гына тӱҥалме объектым чоҥен шуктышаш улыт.
