Марий Йӱштӧ Коча деке уна- влак толын каеныт
Марий Йӱштӧ Кугызан илемышкыже уна- влак толын каеныт. Яраҥ ола гыч Шунэрге шке Аваж дене шукертсек толнеже улмаш, а Советский ола гыч Дед Мороз Йошкар-Олаштак пайремлымаште лийын. Нуным Шернур районышто Йӱштӧ Коча ден Лумӱдыр чодыра тӱрышкӧ вашлияш лектыныт. Вашлиймаш пеш шокшын да веселан эртен. Верысе йоча- влак дене пырля йомакысе чодыра корно дене каеныт, Чодыра Оза, Эмлызе, Вувер, Овда, Киямат ӱдыр, Сонарзе да Маска дене вашлийыныт. Вара курык гыч мунчалтеныт. Модын нойымеке, Йӱшӧ Коча уна- влакым тамлын сийлен. Ынде Яраҥ уна- влак шке декышт Йӱштӧ Кочам вучат.
