Йошкар-Олаште кугу магистральым чоҥаш тӱҥалыт
Марий Элын рӱдӧ олаштыже кугу транспорт проектым шыҥдараш тӱналыт. Тудын акше вич миллиард наре теҥгеш шуэш. У магистраль олам корно пробко деч утарышаш. Республикысе правительствыште у паша идалык корно мегапроектым каҥашымаш гыч тӱҥалын. Республикым вуйлатыше Александр Евстифеев Правительстве пӧртыштӧ тиде тӱҥалтышым шыҥдарыме дене кылдалтше совещанийым эртарен. Тиде оласе малыме да промышленный район-влакым, Киров ден Строитель урем- влак полшымо дене ушышо автомагистраль нерген ойлалтеш. Кызыт еҥ- влак Сомбатхей гыч промзоныш олан рӱдыжӧ гоч каят, ала- мыняр светофорым эртат, кажныштыже эрдене- кастене шагал огыл вучен шогашышт верештеш. У корно дене улыжат ик светофор гоч заводла деке шым минутышто миен шуаш лиеш. У корно кугу машина- влакым ола деч ӧрдыжкӧ лукташ полша. Тидыжат сай: Ширяйково микрорайон ӧрдыж луклан шотлалтмыжым чарна, тудын гоч транспорт кошташ тӱҥалеш. Тиде икмыняр сай могыржо веле. Республикысе кучемын кыртменак пижмыжлан да федерал рӱдерын полышыжлан кӧра Моско республикылан вич миллиард наре теҥге оксам ойыра.
