Балет артист- влак Тӱнямбал конкурсышто шкеныштым чаплын ончыктеныт
Республикысе балет артист- влак Тӱнямбал конкурсышто шкеныштым чаплын ончыктеныт. Сочи олаште 6-шо гыч 12-шо октябрь марте «Юрий Григоровичын «Тӱнян самырык балетше» 10-шо тӱнямбал конкурс эртен. Участник- влак коклаште Эрик Сапаев лӱмеш опера да балет марий театрын артистше-влакат лийыныт. Нунын кугу мастарлыкыштым Российын калык артисткыже Марина Леонован вуйлатыме авторитетан жюри палемден. Аклыше радамыште Россий, Беларусь, Болгарий, Италий, Турций, Корей гыч балет да хореографий сымыктышын лӱмлӧ деятельже- влак лийыныт. Конкурс тергымаш почеш мемнан балетын премьерже Итару Нада шӧртньӧ медальым налын. Ший медаль дене прима-балерина Елена Раськина палемдалтын, Той медальым солистка Валерия Волковалан пуымо. Эше ик кумшо верым балетын солисткыже Софья Дмитриевалан кучыктымо. Марий конкурсант- влакым эн сайын ямдылымылан конкурсын премийже марий театрын педагог-репетиоржо, Марий Элын калык артисткыже Мария Максимовалан логалын.
Фото: Тӱвыра министерстве.
Фото: Тӱвыра министерстве.
