«Черемис йылмын грамматикыже деч цифран технологий марте» лӱман кугу шанче форум эртен
Йылмым, сылнымутым да историйым научно шымлыше Валериян Васильев лӱмеш марий институтышто «Черемис йылмын грамматикыже деч цифран технологий марте» лӱман кугу шанче форум эртен. Мероприятий икымше марий грамматикын ош тӱняш лекмыжлан 250 ий теммылан да Марий Тиште кечылан пӧлеклалтын. Тудо вӱдышӧ шанчыеҥ, филолог, Ай-Ти специалист, тӱвыра пашаеҥ да студент- влакым чумырен. Форумышто Марий Эл Кугыжаныш Погыным вуйлатыше Михаил Васютин, депутат- влак Эдуард Александров ден Эдуард Иманаев лийыныт. Марий парламентын спикерже погынышо- влакым саламлышыла палемден: икымше грамматика марий тиштын икымше факелже улмаш да марий тӱвырам, сылнымутым, туныктымо пашам вияҥдаш негыз лийын. 250 ий эртен. Кызыт ме ужына марий тиште шкенжын кӱлешлыкшым арален коден гына огыл, цифран технологий саманыш куснен. Йылмым цифроватлыме шотышто Марий Элын опытшо Российысе моло калык- влаклан шергакан пример улеш.- каласен Михаил Васютин.
Фото: Марий Эл Кугыжаныш Погын.
Фото: Марий Эл Кугыжаныш Погын.
