Кортысо ечроллер корным олмыктат
Марий Элым вуйлатыше Александр Евстифеевын кодшо ийын Российысе ече спорт федерацийым вуйлатыше Елена Вяльбе дене мутланымыж деч вара пуымо кӱштымашыжым шуктымо семын, Корта ече база кундемыште тиде кечылаште ечероллер трассым капитально олмыкташ да кундемжым тӱзаташ тӱналыт. Ушештарена: тунам тиде пашам шуйкалыде тӱҥалаш да тенийлан бюдежтыште оксам палемдаш кӱштен ыле. Кодшо ийын трассыш электротулым пуртымо. Сандене телым кастенат «Виктория» олимпий резерв спорт школын спортсменже- влаклан тренировкым эртараш да тыглай калыклан мунчалташ йӧн лийын. Август мучашыште эртарыме аукцион почеш подряд организацийым палемдыме. Олмыктымо пашам «Дорожник» предприятий шукташ тӱналеш. Тудын дене 9 миллион утла теҥгелан контрактым ыштыме. Тудо кок тӱжемат кокшӱдӧ утла метрыш шуйнышо трассын асфальт шартышыжым уэмда, йолгорным да ече базе кундемым тӱзата. Пашам тений 7-ше октябрь марте мучашлышаш улеш.
