Ик арняште кок у йоча садым почмо

Ик арняште кок у йоча садым почмо
Таче Республикым вуйлатыше Александр Евстифеев Йошкар-Олаште Восточный, Мирный, Молодёжный да Спортивный микрорайон- влаклан у йоча садым почмаште лийын. Йоча тӧнежым кӱчык жапыште ыштен шуктымо. Тидлан улыжат ик идалык каен. Садик 320 йочалан келыштаралтын. Кум пачашан полатыште 13 группо лиеш. Тушечын нылытше ясле ийготан ньога- влаклан. Кокыт гыч кум ияш марте 100 йочам уже налме. Ырыктыман кӱвар, лифт, видеоэскерымаш, ушан электротул, кумда модмо пӧлем да малыме вер-влак- чылажат шинчам куандара. «Демографий» калыкле проект почеш, тений тыгаяк йоча сад «Интеграл» микрорайонышто почылтшаш да «Лесная сказка» йоча сад дек ешарен чоҥымо ужаш ыштен шукталтшаш. Тыгеже эше 400 йочалан вер лиеш. Тиддеч посна Визымйар посёлкышто 50 верлан сад чоҥалтеш. Медведево посёлкышто 320 верлан йоча полатым чоҥаш тӱналыт. Шушаш кок ийыште рӱдолаштына 4 йоча сад чоҥалтшаш. Тыге эше тӱжем вер почылтеш.

Прошлые выпуски