Могай пластикын шукырак вашлиятмыжым рашемдымек, тудым вара шагалрак лукташ тӱҥалыт
Марий Элысе калыклан пластиквотчинг сомылым тӱналаш темлат. Гринпис ден «Такие дела» сайт сер ден пляжлаште пластикын погынымыжым аклыме кампанийым тӱҥалыныт. Тыге кундемыште илыше калык пластиквотчер лийын да йӧратыме ер ден эҥер серыште ик гана кучылтмо могай пластикын эн чӱчкыдын вашлиятмыжым пален налын кертеш. Пластиквотчинг- тиде пӱртӱсыштӧ пластикым эскерымаш да шымлымаш. Тыгай лӱмым кайыкым эскерыше- влакын бёрдвотчинг лӱмышт почеш шонен луктыныт. Но пластикшым эскераш гына огыл, эше погаш кӱлеш. Тӱшка тергымаш- влак 30-шо сентябрь марте шуйнат. Пластиквотчинглан серын шӱдӧ метр кужытшым ойырен налман да тушто чыла шӱк- куштырам поген, категорийлан ойыркалыман да Российын Гринписышкыже увертарыман. Паша иктаж кок-кум шагат жапым айла. Гринпис ден «Такие дела» порталыш тергымашым эртараш йодмашым пуаш лиеш, почтышкыда мероприятийым кузе эртараш инструкций толеш. Тыгай мероприятий- влак Угарманыште, Самарыште, Екатеринбургышто, Магаданыште, Петрозаводскышто, Воронежыште да моло олаштат эртеныт.
