Илен эртарыме кажне кечылан Юмылан тауштем.- ойла 103 ияш ӱдырамаш

Илен эртарыме кажне кечылан Юмылан тауштем.- ойла 103 ияш ӱдырамаш
                 «Кажне илыме кечылан юмылан тауштем»: Марий Эл гыч ӱдырамашлан 103 ий темын. Курык марий районысо Шындырял гыч Нина Пермякова кугу шочмо кечыжым палемден. Паша да социал аралтыш министерстве ушештара: Нина Ивановна 1922-шо ийын 27-ше ноябрьыште шуко шочшан  ешеш шочын. Изи гычак вольыкм ончен, пасушто тыршен.
                  Сар тӱҥалмеке Вич изаже фронтыш каеныт. Эн изирак Моисейжылан гына пӧртылаш пӱрен. Ӱдыр- влакым Отар селаш чодырам ямдылаш колтеныт. Бомбёжко деч вара окопым кӱнчаш тӱналыныт, кӱртньӧ корнылан шаплым нумалыныт. Имне дене вагон марте пырня- влакым шупшыктеныт, йӱдым вагоныш оптеныт. Кочкаш ситен огыл, кӱвар ӱмбалне маленыт, ыштыр ден йыдалым кошташ вер лийын огыл, сандене шке йымакышт оптен, кап шокшышт дене коштеныт. Шошым пушеҥгым эҥер дене волтеныт.
               Сар деч вара мӧҥгыжӧ пӧртылын да верысе фермыште 35 ий дояркылан ыштен. Тыштак еш пиалым муын. 1965-ше ийыште Никанор Арсентьевичлан марлан лектын, кум йочам ончен- куштеныт. Кызыт Нина Ивановнан шым уныкаже да 9 кугезе уныкаже уло. Нунын коклаште врач, дизайнер, спорт аналитик да менеджер улыт. Илен эртарыме кажне кечылан Юмылан тауштем. Иктым гына йодам- ласкалыкым, тыныс илышым, йоча- влакын чыла сай лийже, уныка- влакын илышышт таза лийже,- ойла тудо.
                Нина Ивановнам саламлаш Курык марий районысо социал обслуживаний рӱдер гыч миеныт. Тудлан Марий Элым вуйлатышын лӱман саламлымашыжым, шарнымашан пӧлекым да пеледышым кучыктеныт.
             Фото: Паша да социал аралтыш министерстве.

Прошлые выпуски