Йытын тений сайын кушкын
Марий Элыште кызыт уло куатын йытыным кӱрыт. Тиде культурым ончен- куштышо кугу предприятийлан «Оршакысе йытын» агрохолдинг шотлалтеш. Районышто кушкылым 700 утла гектареш вераҥдыме. Тудо сайын кушкын. Йытыным погымо годым тӱрлӧ технологийым кучылтыт. Мутлан, кӱчык кӱляшым налашлан, йытыным тӱредыт да кошкымек, трестам ышташ колтат. Агрохолдинг тыгак йытын нӧшмым шапашла. Тидлан кушкылым вожшыге луктыт да калтажым ойырен налыт. Ял озанлык министерствын ончыктымыж почеш, кызыт тыгак пырчан да пырчан-отызан культурым погат. Тиде сомылым 38 тӱжем гектарыште шуктымо. Тидыже планын 31 процентше лиеш. Кокла лектышыже ик гектарлан шотлымаште 24 центнерыш шуэш.
