Волжск ола йӱштӧ жапым уэмдыме коллектор дене вашлиеш
Волжск олаште канализаций коллекторым олмыктымо паша тичмаш куатын кая. Кугу ачалыме пашам Республикым вуйлатыше Александр Евстифеевын кӱштымыж почеш тӱҥалме. Тудо паша дене июльышто Волжскыш мийымыж годым шуко ий дене погынышо тиде проблемым виктарен колташ шӱден ыле. Тидлан Правительствын резерв фондшо гыч 16 миллион теҥгем ойырымо. Пашам кузе шуктымым вуйлатыше шке терген шога. Тудын кӱштымыжӧ почеш Волжск олам вуйлатыше- влак объектыш миен, пашан кузе кайымыжым онченыт. Икымше ноябрь марте тушто пашам мучашлышаш улыт. Йӱштӧ жапыш сай коллектор дене куснат. «Дружба» уремыште верланыше коллектор «Заря», «Дружба», «Центральный», «Строитель» микрорайонлам обслуживатла. Тушто 20 тӱжем наре еҥ ила. Коллекторым 1980-шо ийыште чоҥымо, пуч- влакым ночко, купан мландыш пыштыме. 10 ий гычак колектор шолдыргаш тӱналын.
