Киров марий- влак шке геройыштлан чапкӱм почыныт

Киров марий- влак шке геройыштлан чапкӱм почыныт
              Киров марий- влак шке геройыштлан чапкӱм почыныт. Кодшо кечылаште Кикнур районысо Шапта (Какшанмарий) ялыште чапланыше марий князь Никита Иванович Бай-Борода- Ош Пондашлан шарныктыше кӱм торжественно почмо. Тиде событий марий калыкын историй шарнымашыжым да тӱвыра поянлыкшым арален кодымаште поснак кӱлешан улеш. Чапкӱм торжественно почмеке верысе Тӱвыра Портыштӧ уна да верысе калыклан Угарман областьысе Шаранге, Тонкин, Тоншай округла гыч марий коллектив- влак концертым ончыктеныт. Кӱэш марла тыге возымо: «Марий талешке Кугуз Бай-Борода Никита Иванович Ош Пондаш 14-ше курым». Легенде почеш Ош Пондаш марий князь- Кугуз   лийын. Тудын 14-ше курымышто вуйлатыме жапшым марий калыкын историйыштыже шӧртньӧ курымлан шотлат. Тудо жапым эрыкан улмо, чынлык да пеледме пагыт семын аклат. Тудын нерген преданий ден легенде- влак аралалт кодыныт, а Ромачин шнуй ото тудым тойымо верлан шотлалтеш. Тудо ушан да мунло вуйлатыше гына огыл, уста дипломат да сарзе лийын. Шӧртньӧ Орда ден Галич княжестве йымалне улшо Вӱтла княжествын эрыкшым пеҥгыдемдаш тыршен. Тынеш пурымеке вашкылым ышташ манын ӱдыржым Галич князьлан марлан пуэн. Но политике шотышто умлыдымаш кужу сар деке конден. Ош Пондаш Шӧртно Ордан полышыжлан эҥертен сеҥышыш лектын да Галичлан надырым тӱлымӧ деч шке калыкшым утарен.
               Фото: Шараҥге тӱвыра пӧлкан ВК лаштыкше.

Прошлые выпуски