Козьмодемьянск олаште 295 миллион теҥгем шогышо причалым чоҥымо паша мучашыш лишемеш
Козьмодемьянск олаште 295 миллион теҥгем шогышо причалым чоҥымо паша мучашыш лишемеш. Тиде ола турист ден экскурсант- влакым шкеже деке кумылаҥден шогышо вер улеш. Тымарте республикыштына капитально чоҥымо порт сооружений- влак лийын огытыл. Марий Элым вуйлатыше Юрий Зайцев Чыкма олаш мийымыже годым пашан кузе кайымыжым аклен. Тудлан умылтареныт: объектым пашаш колтымеке тудо суткаште 200 утла пассажирым вашлийын кертеш. Паша график почеш кая. Таче кечылан причал пырдыжын ӱлыл ужашыже ямде, кӱшыл павильоным ышташ кодеш. Олан мэрже Михаил Козловын мутшо почеш тений Козьмодемьянскыш 250 теплоход чарнен. Республикым вуйлатыше палемден: олан инфраструктурыжо турист- влакын ешаралтмыштлан ямде лийшаш. Кызыт олаште 18-ше-19-ше курымласе 160 утла архитектура памятник уло Остап Бендер лӱмеш тоштер, Сӱрет да историй тоштер, Вӱд йымач лукмо тумын тоштерже да шуко молат пашам ыштат. Марий Элым вуйлатыше калыкын эн чот йӧратыме Романов лӱмеш кава йымалсе этнографий тоштерыш миен. Тудым Козьмодемьянск олалан 400 ий теммылан 1983-шо ийыште почмо. Тудын кумдыкшо вич гектар утлаш погына. Кундемыштыже 60 объектым чоҥымо, 7 тужем утла экспонатым чумырымо. Тоштерым туризм шотышто «Юлышто этнотуризм рӱдер» проектыш пуртымо. А проектшым Юл кундем федерал округын «Волжское путешествие» округысо инициативыш пурталтын.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
