Козьмодемьянскыште кугурак тукымын вашлийме рӱдерже почылтын
Козьмодемьянскыште кугурак тукымын вашлийме рӱдерже почылтын. Тудым почмаште Козьмодемьянск ола ола округым вуйлатыше Игорь Волков, Россий Социал фондын регионысо пӧлкажым виктарыше Владимир Орехов, россий пенсионер- влак ушемын регонысо пӧлкажым вуйлатыше Валерий Михеев, «ший» добровольчествын регионысо рӱдержым вуйлатыше Наталья Морова, верысе мер организаций- влакын еҥышт оласе кугурак тукым чолга еҥ- влак лийыныт. Уна- влаклан самырык артист-шамыч концертым ончыктеныт, верысе кидмастар- влак калык усталык ончерым ямдыленыт. Тиддеч посна рӱдерым почмаште Социал фонд пӧлка ден Козьмодемьянск администраций коклаште рӱдер негызеш эртарыме мероприятий- влакым ямдылыме нерген соглашенийым пеҥгыдемдыме. Марий Элым вуйлатыше Юрий Зайцев шке телеграм-каналыштыже палемден: Козьмодемьянскыште пенсий ийготан шым тӱжем наре еҥ ила. Шукыжо чолга илыш йӱлам куча, добровольчествыш, тӱрло мероприятийлаш ушнат. Кумылан- влаклан интерес шот дене 11 клуб ден секций пашам ыштат. Рӱдерыш мийыше- влаклан оҥай еҥ- влак дене вашлиймаш, спорт занятий, пырля кином ончымаш, ӱстембал модмаш кас, сылнымут каҥашымаш, усталык кружок- влак эрташ тӱҥалыт.
Фото; СФР-ын Марий Элысе пӧлкаже.
Фото; СФР-ын Марий Элысе пӧлкаже.
