Кугыжаныш Погынын тенийсе пытартыш сессийже 29-ше декабрьыште лиеш

                     Марий Эл Кугыжаныш Погынын тенийсе пытартыш сессийже 29-ше декабрьыште лиеш. Теҥгече Погын президиумын 37-ше заседанийже эртен. Тудо Кугыжаныш Погынын кумшо- шымше созывласе депутатше Виктор Севастьяновым ик тат шып шоген шарнымаш гыч тӱҥалын. Умбакыже президиум 15-ше сессийын повесткышкыже темлымаш- влакым ончен лектын. Тудыжо 29-ше декабрьыште погына. Сессийлан ямдылалтме да эртарыме программым пеҥгыдемдыме, паша радамжым палемдыме. Погыным вуйлатыше Анатолий Смирнов тыгак «Марий Элын Конституцийышкыже тӧрлымашым пуртымо нерген» законын проектше дене пашам виктараш кӱлешым палемден. Шушаш сессийыште тиде законопроектым икымше лудмаште ончаш тӱҥалыт. Тиддеч посна перзидиумын еҥже- влак шушаш ийлан Погынын паша программыжым каҥашеныт.

Прошлые выпуски