Ӱлыл Осиял уэш лӱмжым пӧртылтен да корным чоҥа
Республикысе эн самырык ял шонымашыж деке лишемеш. Параньга район администрацийын увертарымыж почеш, «Ял кундемлам вияҥдымаш» кугыжаныш программе почеш Ӱлыл Осиял ял марте пеҥгыде шартышан корным ышташ палемдыме. Шке жапыштыже тиде ялым вес ял деке ушымо улмаш. Тудыж деке корным чоҥеныт, а тидыже корно деч посна кодын. Ял калыкын тыршщымыжлан кӧра, Россий Правительствым вуйлатыше Дмитрий Медведевын пунчалже почеш Ӱлыл Осиялым посна ял семын ыштыме да шке лӱмжым пӧртылтымӧ. Ынде корно йодыш верже гыч тарванен. Район администрацийым вуйлатыше Альфит Ибраев «Марийскавтодорын» специалистше- влак дене вашлийын да пырля ялыш миен савырненыт. Ынде лишыл жапыште техзаданийым ыштат да корным чоҥаш проектлан конкурсым увертарат.
