Марий ӱдыр-рвезе- влак «Зарницы Поволжья» таҥасымаште вийыштым тергат
Оренбургышто теҥгече «Зарницы Поволжья» военно-спорт модмашын 7-ше окружной финалже торжественно почылтын да 14-ше сентябрь марте шуйна. Юл кундемысе федерал округын 14 командыж гыч 200 юнармеец погынен. Нуно шке кундемлаштышт сеҥыше улыт. Погынышо- влакым полдпред Игорь Комаровын лӱмжӧ дене Оренбург областьысе тӱҥ федерал инспектор Ринат Гильмутдинов саламлен. Вара верысе войсковой часть негызеш таҥасымашлан тӱналтышым пуымо. Рвезе-ӱдыр- влак гранатым кышкеныт, гимнастике дене таҥасеныт, 60 метрыш куржталмаште ӱчашеныт. Тиде кечылаште нуно чарак гоч эртымаште, туризм полосаште, автоматым рончен-погымаште, лӱйкалымаште да тактик модмаште мастарлыкыштым ончыктат. Тиддеч посна строевой подготовкым, илышыште лӱдыкшыдымылыкын негызшым палымашым, военно-историй викториныште шинчымашыштым тергат. Марий Эл гыч тушто 13 гыч 15 ияш марте 14 еҥ улыт: 10 рвезе да ныл ӱдыр. Нуно Волжский районысо Шарача школышто тунемыт.
