Марий Эл кажне 100 тӱжем еҥлан шотлымаште коронвируслан шымлымашым эртарыме дене 10 ончыл регион коклашке пурен

Марий Эл кажне 100 тӱжем еҥлан шотлымаште коронвируслан шымлымашым эртарыме дене 10 ончыл регион коклашке пурен. Теҥгече республикым вуйлатыше Александр Евстифеев коронвирус ваштареш шогымо шотышто Россий правительстве пеленысе Координационный Совет президиумын да Госсоветын пашаче групыжын заседанийыштышт участвоватлен. Совещанийым Премьер-министр Михаил Мишустин эртарен. Тудо палемден: Российысе кундемлаште тазалыкаралтыш системын коронавирус дене кучедалаш ямде улмыжым каҥашена, поснак медицина организаций- влаклан кӱлеш оборудованийым ситарыме нерген. Президент тудын срокшым палемден ыле- 28-ше апрель. Арня деч шагалрак жап кодеш, - манын Мишустин. Таче кечылан Марий Элыш федерал бюджет гыч угыч ыштыме койко фондлан оборудованийым ситараш 272 миллион теҥге пурен, тыгак 87 миллион теҥге - медицина пашаеҥ- влаклан кумылаҥдыме оксам тӱлаш, 13 миллион утла теҥге - медицина техникым налаш. Республикын бюджетше 175 миллионым ойырен. Тушечын 20 миллионжо ИВЛ-лан, 6-шо обсерваторлан полшаш, молыжо эмым да аралыме средствым налаш кучылталтын. Теҥгечысе кечылан республикыште 333 еҥын чержым пеҥгыдемдыме ыле. Инфекционный стационарлаште 215 еҥ эмлалтеш. Нунын кокла гыч 41-ыжын черым пеҥгыдемдыме. 45 еҥын чержым неле семын палемдат, 164-шын кокла нелытан, 6 еҥже черым кушылгын эрта. Кок еҥ шӱлымӧ аппарат дене пайдалана, 88 еҥлан кислородым ешарат. Ик суткаште гына 29 пациент эмлалт лектын, а пандемий жапыште чылаже 81 еҥ черым сеҥен. Мониторинг жапыште 13 тӱжемат 851 лабораторный тергымашым эртарыме. Тыге тест дене авалтыме шотышто 100 тӱжем еҥлан шотлымаште республикына элна мучко 6-шо верым айла. Кажне кечын 500 пробым ыштат.

Прошлые выпуски