Марий Элысе тӱҥ федерал инспектор координационный совещанийым эртарен
Марий Элысе тӱҥ федерал инспектор Павел Волков исполнительный кучемын верласе органжым вуйлатыше- влак дене координационный совещанийым эртарен. Полномочный представительын пеҥгыдемдыме совещаний план дене келшышын, повесткыште калыкле проект- влакым шыҥдарыме, долевой чоҥымашке ушнышо- влакын права ден интересыштым аралыме шотышто законодательствым шуктымо йодыш- влак лийыныт. Каҥашымаште чоҥымаш министр Михаил Степанов, эл кӧргӧ политике, верысе самоупраленийым вияҥдымаш да юстиций министр Михаил Данилов да промышленность министрын алмаштышыже Олег Сосков лийыныт. Тӱҥалтышыште Павел Волков Россий МЧС-ын Марий Элысе виктемжым вуйлатыше Александр Малкинлан тыршен пашам ыштымыжлан полномочный представительын Чап Грамотыжым кучыктен. Федерал казначейство виктемым вуйлатыше Ангелина Астафьева палемден: кодшо ийын кум калыкле проектлан ойырымо оксам тичмаш кучылтмо. «Демографий» проектлан ойырымо окса дене кум йоча садым почмо. Илалше еҥ- влакым шупшыкташ 17 автомобильым налме, Красностекловар психоневрологий интернатын корпусшым чоҥаш тӱналме. Погынымаште тыгак каласыме: ондалалтше дольщик- влакын йодышышт график почеш виктаралтеш. Проблеман ик объект кодын. Ончыкыжым тыгай ынже лий манын, федерал да верласе исполнительный кучем орган- влак ваш кутырен пашам ыштышаш улыт.
