Шошымсо эрыктыме месячник умбакыже шуйна
Йошкар-Олаште шӱкшакым эрыктыме да кундемлам тӱзландарыме шошымсо месячник умбакыже шуйна. Тушко муниципал предприятий- влакат, шуко пачеран пӧртлам обслуживатлыше организаций- влакат ушненыт. Кудывечылаште паша пеш шуко. Лум йымач тӱрлӧ куштыра шулен лектын: балкон йымалне окурко, кампет кагаз, пакет, кленча, контейнер марте намен шуктыдымо шӱкшакан пакет да молат. Калыкым тиде куштырам кораҥдымашке ушнаш ӱжыт. А теве «Заводской» ЖЭУК газон ден клумбылам сӧратараш тӱналын.
