17 ияш рвезе синтетикан наркотикым шаркалаш тӧчен
17 ияш рвезым кугу тӱшка синтетикан наркотикым ужалаш тӧчымыжлан судитлаш тӱналыт. Йошкар-Оласе следствий пӧлка тудын шотышто уголовный пашам шымлымашым мучашлен. Рвезе интернетыште наркотикым ужалкалышым муын. Тений 12-шо январьыште наркотикан пакетым Медведево район гыч налын каен. Тиддеч вара тудым наркоконтроль виктемын пашаеҥже-влак Йошкар-Оласе ик пӧртын подъездыштыже кученыт. Пеленже синтетикан наркотик дене 104 пакетым верештыныт. Уголовный пашам судыш колтымо.
