Марий Элыште 3 гыч 7 ияш марте йоча- влаклан оксам пуаш тӱҥалыныт

Марий Элыште 3 гыч 7 ияш марте йоча- влаклан оксам налаш 10 тӱжем утла йодмаш пурен. Марий Элым вуйлатыше Александр Евстифеев Россий Правительство председательын алмаштышыже Татьяна Голикован эртарыме селектор совещанийыште участвоватлен. Мутланымаш 3 гыч 7 ияш марте йоча- влаклан тылзе еда пуышаш оксам кузе тӱлымӧ йодышлан пӧлеклалтын. Тиде у полышым Президент Владимир Путинын кӱштымыж почеш пуртымо. Тыгай оксалан 9 тӱжемат 830 теҥге дач шагал налше еҥ- влак праван улыт. Тыгай ешыште 3 гыч 7 ияш марте икмыняр йоча кушкеш гын, пособий кажныжлан пуалтеш. Тидын годым ондак регион гыч пуаш палемдыме окса тичмаш аралалт кодеш. Оксан кугытшо регионышто йочалан илен лекташ ситыше эн изи оксан 50 процентше лийшаш але вич тӱжемат 33 теҥге. Тудым икымше июнь гыч пуат, а оксажым тений икымше январь гычак шотлаш тӱҥалыт. Мутлан, йоча икымше январьлан  кум ийым темен гын, икымше июньышто йодмашым возышо еш оксам тенийсе икымше вич тылзылан налеш. Январь гыч июнь марте йочалан 8 ий темын гын, шийвундым январь гыч 8 ияш лийме жапше марте тӱлат. Кызыт республикыште социал аралымаш органлаште полышым вучышо семын учётышто 19 тӱжем наре еш шога. Тушто 3 гыч 7 ияш марте 24 тӱжем икшыве ила. Йодмашым кугыжаныш полыш порталыште электрон йӧн дене пуымат сита. Кӧн тушто личный кабинетше уке гын, МФЦ гоч але социал полышым пуышо рӱдер гоч пуыман. Кокымшо июньлан шотлымаште кугыжаныш полыш портал гоч лу тӱжемат 740 йодмашым пуымо.

Прошлые выпуски