Самоизоляцийыш кайыше социал пашаеҥ- влаклан оксам тӱлаш тӱҥалыныт
Марий Элыште социал тӧнежлаште пашам ыштыше да шке ончымо еҥышт дене пырля самоизоляцийыште улшо- влаклан оксам тӱлаш тӱналыныт. Марий Элым вуйлатыше Александр Евстифеев социал вияҥмаш министр Марина Островская дене пашаче вашлиймашым эртарен. Мутланымаш пандемий жапыште министерствыш пурышо социал тӧнеж- влакын пашашт да тенийлан план нерген лийын. Министрын мутшо почеш, социал аралтыш системыште 65 кугыжаныш тӧнеж уло. Мӧҥгыштӧ куд тӱжемат пеле еҥ социал полышым налеш, стационар тӧнежлаште кок тӱжемат пеле еҥ полыш дене пайдалана. Коронавирус жапыште мемнан министерстве Российыште ик эн ончыч ончымо еҥышт дене пырля самоизоляцийыш каяш кутырен келшеныт. 12-шо апрель гыч тыгай режим дене 11 тӧнеж пашам ышта. Тушто тыршыше- влаклан аралыше вургем, маске, дезинфикатор тичмаш ситышын уло. Лишыл жапыште Российысе министерстве гоч кугу тӱшка аралыше средствым кондышаш улыт. Петырыме режимыште кызыт 300 социал специалист да тӱдемат 890 полышым налше улыт. 400 наре еҥ кумылаҥдыше оксам налеш. Социал тӧнежлаште коронавирус инфекцийым палемдыме огыл. Сандене врач- влаклан 40 тӱжем теҥгем, кыдалаш медицина персонал да социал пашаеҥ- влаклан 25 тӱжем, изирак медицина пашаеҥ- влаклан 20 тӱжем теҥге гыч тӱлышаш улыт. Тиддеч посна технический персоналат налшаш. Икымше 12 миллион теҥге траншым кусарыме. Тӱшка кугытшо 27 миллион теҥге лийшаш,- каласен Марина островская. Республикым вуйлатыше ушештарен: правительствын палемдыме окса чарак деч посна тӱлалтшаш.
