Марий Элын Правительствыже экономикылан полшаш антикризис мерын кокымшо пакетшым ямдылен

Марий Элын Правительствыже экономикылан полшаш антикризис мерын кокымшо пакетшым ямдылен. Тидын нерген у инфекций ваштареш шогышо оперативный штабын заседанийыштыже Республикым вуйлатыше Александр Евстифеев увертарен. Келшыше порученийым промышленность, экономически вияҥмаш да торговля министерствылан пуымо. 20-шо апрель гыч поснак нелылыкыш логалше отрасль- влаклан- туризмлан, тӱшкан пукшымо вер, физкультура, тазалыкаралтыш да спорт паша, унагудо бизнес, быт полыш, стоматологий паша да туныктымаште тыршыше организаций- влаклан микрозаймым налаш 0 тичмашат 1 луаш процент льготан ставкым палемдыме. Министерствылан тыгак аралалтме средствым шукырак лукташ задачым шындыме. Кызыт лу предприятий маскым урга. Нуно 150 тӱжем маскым ыштеныт. Тудым Моско ден Киров областьышкат колтат. Койко фондым ямдылыме паша умбакыже шуйна. Кислородым ситарыме шотыштат пашам шуйыман. Роспотребнадзор виктемым вуйлатыше Светлана Булатова палемден: Черланыше- влакын тӱшка чотышт деч 85 процентшым черланыше- влакын кылым кучымо еҥ-влакым рашемдыме годым пален налме. Мӧҥгышто амбулаторно эскерымаште 58 процент шотлалтеш. Тушечын 78 процентшын клинический проявленийже уке. Сандене кажне очагым рашемдыме шотышто эртарыме пашана чын,- каласен тӱҥ санитар врач. Тымарте анализым Угарманыш, Москош, Новосибирскыш колтымо гын, ынде иктешлымашым республикыштак ышташ тӱналыт. Инфекцийым вашкерак эрыктен луктына гын, республикыште саеммаш вашкерак тӱҥалеш,- каласен Александр Евстифеев.

Прошлые выпуски