Марий Эл ден Беларусь республике коклаште вашкыл шотышто пашаче группын икымше заседанийже лийын
Марий Эл ден Беларусь республике коклаште вашкыл шотышто пашаче группын икымше заседанийже лийын. Тудо видеоконференцкыл формат дене эртен. Заседанийым Марий Эл могыр гыч промышелнность министр Станислав Крылов, Беларусь велым илыме вер да коммунал озанлык министр Андрей Хмель вӱденыт. Вашлиймашыште ончыкылык пайдале вашкыл нерген ойлымо. 2020-шо ийын лектышыже почеш внешнеторговый оборот кок республике коклаште 23 миллион доллар лийын. Тидыже Марий Эл республикын внешнеторговый оборотшо деч 9 процент наре лиеш да 19-ше ий дене таҥастарымаште кок процент нарылан ешаралтын. Беларусьыш республикына гыч 69 организаций ден амалкалче шке сатужым колтен. Экспортын кугу ужашыже йӱкшыктарыше да кылмыктыше оборудованийлан логалеш. Тиддеч посна омсалан да тыглай сура, ру, электрон интеграл схемын ужашыже, электротехник сату, хроматограф, кочкыш промышленностьлан машина ден оборудований колталтеш. Вашлиймашыште ондак пеҥгыдемдыме соглашенийын кӱлешлыкшым палемдыме да тудым шыҥдараш ямде улмо нерген каласыме.
