Марий Эл гыч кучедалше- влак Ульяновск областьысе турнирыште шкеныштым сайын ончыктеныт
Марий Эл гыч кучедалше- влак Ульяновск областьыште регион- влак кокласе турнирыште шкеныштым сайын ончыктеныт. Димитровград олаште кок кече тӱнямбал категориян судья, тренер Александр Леонтьевлан пӧлеклалтше греко-рим кучедалмаш дене регион- влак кокласе кӱкшытан 13-шо турнир эртен. Таҥасымашыште Юл кундем федерал округ гыч 20 командын 200 наре кучедалшыже участвоватлен. Марий Элын лӱмжым Российын сулло тренерже Серяковын тунемшыже- Волжск гыч кучедалше- влак араленыт. Чыла вашлиймашым чаплын эртарен да турнирын сеҥышыже лӱмым Памар школ гыч Матвей Колениченко налын. Тудын кучедалме 65 килограмм марте нелыт категорийыште чот виян кучедалше- влак лийыныт. Артём Ибрашев ден Егор Юшков, коктынат 9-ше школ гыч улыт, ший награде дене палемдалтыныт.
Фото: Егор Данилов.
Фото: Егор Данилов.
