Марий Эл гыч куржталше- влак Юл кундем федерал округын первенствыштыже ший ден шӧртньӧ медальым сеҥен налыныт
Марий Эл гыч куржталше- влак Юл кундем федерал округын первенствыштыже ший ден шӧртньӧ медальым сеҥен налыныт. Ульяновск олаште Юл кундем округын куштылго атлетике дене Чемпионат ден Первенствыже мучашлалтын. Таҥасымашке округысо ятыр кундем гыч 680 наре ен ушнен. Марий Элгыч вигак икмыняр спортсмен шке сеҥымашыже дене куандарен. Олимпий резерв училищын спортсменже Андрей Мошкин 20 ияш марте юниор- влак коклаште кок тӱжем метрыш чарак гоч куржталмаште Первенствын шӧртньӧ медальжым сеҥен налын. Сергей Ожиганов тыгак юниор- влак коклаште чарак гоч 60 метрыш куржмаште Первеннствын ший медальже дене палемдалтын да Марий Элын рекордшым шынден- 8,49 шӱдаш секунд. Тыгак республикын у рекордшым 18 ияш марте ӱдыр- влак коклаште да 20 ияш марте юниорко-влак коклаште 200 метрыш куржмаште Мария Чеботарёва ончыктен. Тудын лектышыже 26, 74 шӱдаш секунд, - увертара спорт-туризм министерстве.
Фото: Спорт-туризм министерстве.
Фото: Спорт-туризм министерстве.
